انصار: ( د کب ۱۱ مه)، امریکايي خپرونې فارن پالیسي په یوه مقاله کې ویلي چې له طالبانو څخه د امریکايي وسلو د بېرته ستنولو په اړه د امریکا د ولسمشر ډونالډ ټرمپ غوښتنه، د دې څرګندونه کوي چې هغه پر دې ډلې د فشارونو د نویو وسیلو په لټه کې دی.
د مقالې له مخې، ټرمپ غواړي د دې غوښتنو له لارې، په طالبانو کې د امریکا له لاسه وتلی نفوذ بېرته ترلاسه کړي.
په مقاله کې راغلي: «په افغانستان کې د امریکایي ځواکونو حضور، د طالبانو پر وړاندې د فشار وسیله وه، خو کله چې واشنګټن له دې هېواده ووت، نو دا امتیاز یې له لاسه ورکړ.»
د "فارن پالیسي" د راپور له مخې، متحدایالتونه له افغانستانه له وتلو وروسته، تل هڅه کړې چې پر طالبانو خپل اغېز وساتي.
په مقاله کې راغلي: «د امریکایي وسلو بېرته راګرځول ناممکن ښکاري، ځکه طالبان دا تجهیزات د امریکا د ماتې سمبول بولي او هغه خپله ارزښتناکه بریا ګڼي.»
فارن پالیسي زیاته کړې، طالبانو تر اوسه د ټرمپ وروستي غوښتنې ته رسمي ځواب نه دی ویلی، خو مخکې یې د ټرمپ دا غوښتنه رد کړې وه او ان داسې ښکاري چې له امریکا یې د نورو وسلو د ورکړې غوښتنه کړې وه.
ټرمپ د خپلې انتخاباتي مبارزې پر مهال، او همداراز سپینې ماڼۍ ته له بېرته راستنېدو وروسته، څو ځله ټینګار کړی چې د افغانستان پرېښودل، یوه ستره تېروتنه وه او امریکا باید خپلې پوځي وسلې بېرته ترلاسه کړي.
تېره اوونۍ ټرمپ په یوه غونډه کې وویل: « له افغانستانه وتل، یوه وحشتناکه تېروتنه وه. چین له افغانستانه د امریکايي پوځیانو له وتلو وروسته د بګرام هوايي اډه ونیوله.»
ټرمپ یو ځل بیا پر جو بایډن انتقاد وکړ، او هغه یې له افغانستانه د امریکايي پوځیانو د ناڅاپي ایستلو په خاطر ملامت کړ.
د امریکا د دفاع وزیر، پیت هګست هم ویلي: «موږ به له افغانستانه د ګډوډ وتلو په اړه څېړنه وکړو او د دې عملیاتو مسوولان باید بشپړ ځواب ووایي.»
URL تعقيب: https://www.ansarpress.com/pashto/35023
