انصار: (د لیندۍ ۴ مه) د ازبکستان دولتي رسنیو راپور ورکړی چې د سږ کال د تېرو لسو میاشتو په لړ کې دغه هېواد افغانستان ته د ۸۵۵ میلیون ډالرو په ارزښت توکي صادر کړي دي.
د راپور له مخې، ازبکستان په دې موده کې له افغانستان سره د نژدې ۹۰۰ میلیون ډالرو په ارزښت سوداګري کړې ده.
په یادو لسو میاشتو کې روسیه، چین، قزاقستان، ترکیه، افغانستان، فرانسه، او قرغزستان د ازبکستان مهم شریکان بلل شوي دي.
شمېرې ښیي چې ازبکستان په تېرو لسو میاشتو کې افغانستان ته د ۸۵۵.۹ میلیون ډالرو په ارزښت توکي صادر کړي او د ۲۸.۳ میلیون ډالرو په ارزښت یې له افغانستان څخه توکي وارد کړي دي.
ازبکستان په سیمه کې د افغانستان یو مهم سوداګریز شریک ګڼل کېږي، چې د دواړو هېوادونو ترمنځ هر کال د میلیونونو ډالرو په ارزښت سوداګریزې معاملې ترسره کېږي.
تر دې مخکې افغان چارواکو اعلان کړی و چې افغانستان او ازبکستان موافقه کړې چې سږ کال دوه اړخیزه سوداګري ۱ میلیارد ډالرو ته رسوي او په راتلونکو درې کلونو کې به یې ۳ میلیارده ډالرو ته لوړه کړي.
د افغانستان او ازبکستان ترمنځ سوداګریزې اړیکې د سیمې د اقتصادي همکارۍ په اهمیت ټینګار کوي، چې د ثبات او ودې لپاره اړینه ده. څنګه چې ازبکستان خپل صادراتي شراکتونه پراخوي، په منځنۍ آسیا کې د سوداګرۍ په شبکه کې د یو مهم لوبغاړي په توګه یې رول لا قوي کېږي.
د افغانستان لپاره له ازبکستان سره د سوداګرۍ زیاتوالی له دې کبله هم مهم دی چې پاکستان له سوداګرۍ څخه د سیاسي فشار د وسیلې په توګه کار اخلي او هر څه موده وروسته خپلې سوداګري لارې بندوي او په دې توګه یې هغه اعتبار زیانمن کړی چې د سوداګرۍ د ودې لپاره پکار دی.
URL تعقيب: https://www.ansarpress.com/pashto/34516
سور صلیب: د افغانستان د اقتصادي سیستم د سقوط د مخنیوي هڅه کوو