انصار: (د تله ۳۰ مه) د طالبانو حکومت تایید کړه چې ځواکونو یې په غور ولایت کې د داعش هغه کسان وژلي چې تېره میاشت یې د دایکنډي پر بې ګناه ملکي وکړو په وژونکي برید کې لاس درلود.
د طالبانو د حکومت ویندوی ذبیح الله مجاهد بې له دې چې د داعش یا کومې بلې ډلې نوم واخلي تېره شپه پر خپله ایکسپاڼه ولیکل: «نن ناوخته په غور ولایت کې یوه وحشي او فتنه ګره ډله له منځه ولاړه، دا هغه ډله وه چې د غور او دایکنډي ترمنځ یې څه باندې شلو هزاره ګانو ته مرګ ژوبله اړولې وه.»
ده دا هم ویلي چې د دې ډلې مشري له بلوچستان څخه کېده.
طالبانو تر دې وړاندې هم څو ځلې ویلي چې د داعش مشران په بلوچستان کې اوسي او له هغه ځایه په افغانستان کې ورانکارو عملیاتو ته دوام ورکوي.
ده همداراز ویلي چې طالبانو د غور ولایت د مرکز په مارکو سیمه کې د یادې ډلې پر یوه پټنځای عملیات کړي، چې په پایله کې یې د دې ډلې مشر او یو بل مهم غړی وژل شوي دي.
ذبیح الله مجاهد دا هم ویلي چې دې ترهګرې ډلې د غور په ګډون په کابل او بامیان ولایتونو کې په څو تروریستي بریدونو کې لاس درلود.
تر دې مخکې په غور ولایت کې له داعش سره د نښتې خبر طالبانو ته نژدې ویبپاڼې المرصاد ورکړی و.
URL تعقيب: https://www.ansarpress.com/pashto/34004
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني