انصار: (د میزان ۱۱ مه)، د متحدو ایالتونو د بهرنیو چارو وزیر اعلان وکړ چې د افغانستان لپاره د امریکا ځانګړی استازی ټام ویسټ به له خپلې دندې ګوښه شي او پر ځای به یې د بهرنیو چارو وزارت د بندیزونو د همغږۍ د دفتر سرپرست شي.
په پام کې ده چې د ښاغلي ویست دنده د افغانستان لپاره د امریکا په سفارت کې اوسنۍ شارژدافېره کرن ډیکر او همداراز د افغان ښځو لپاره د متحدو ایالتونو استازې رینا امیري په غاړه واخلي.
د افغانستان لپاره د امریکا سفارت د قطر له دوحې څخه فعالیت ته دوام ورکوي.
د امریکا د باندنیو چارو وزیر انتوني بلینکن وویل، ښاغلی ویسټ، چې د ۲۰۲۱ کال په اکتوبر کې د افغانستان د ځانګړي استازي په توګه وټاکل شو، واک ته د طالبانو له راستنېدو وروسته د یوې ننګوونکې دورې په ترڅ کې د متحدو ایالتونو د پالیسۍ په جوړولو کې مهم رول لوبولی دی.
بلینکن له ویسټ څخه مننه وکړه چې د متحدو ایالتونو د ملي ګټو او د افغانانو د بشري اړتیاوو ترمنځ یې انډول په پام کې ساتلی و.
ده همداراز ویلي چې ویست د خپل ماموریت پرمهال، د نړیوالو شریکانو په همکارۍ د بشري هڅو مشري وکړه څو په دې توګه په افغانستان کې د پراخې قحطۍ مخه ونیسي او د میلیونونو افغانانو عاجلې اړتیاوې پوره کړي.
بلینکن وویل، «ټام په یوه پیچلې دوره کې په مهارت سره د افغانستان په اړه د ډیپلوماسۍ مشري کړې ده.»
ټام ویست د افغانستان په اړه د پراخو معلوماتو خاوند دی او په پښتو ژبه هم پوهېږي.
URL تعقيب: https://www.ansarpress.com/pashto/33717
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني