په هند کې د دفاعي څېړنیز مرکز (ډي ار ډي او) مسوولین وايي، د (اګني پرائم) بالسټیک توغندي ازموینه بریالۍ وه.
هندي مسوولین وايي، دا توغندی د اتومي موادو لېږد وړتیا لري. د ډي ار ډي او مسوولینو په خبره د توغندي ازموینه د اړیسه ایالت په (اې پي جې عبدالکلام) مرکز کې شوې، چې د دې ډول ازموینو لپاره کارول کېږي.
د یادې ادارې مسوولین وايي، ’’دا ازموینه چې د شپې ناوخته وشوه، په بشپړ ډول بریالۍ وه او ټول ټاکل شوي هدفونه ترلاسه شوي دي.’’
د هند دفاع وزیر راج نات سینګ په یوه اعلامیه کې په دې هکله ویلي: ’’د دې توغندي بریالۍ ازموینه او د هندي وسله وال پوځ د وسلو او تجهیزاتو په زېرمه کې د دې زیاتوالی به د هېواد وسله وال پوځ عسکري وړتیا نوره هم زیاته کړي.’’
د یادونې ده، چې (اګني پرائم) د اګني توغندیو د لړۍ شپږم هغه دی، چې د چارواکو په خبره له ۱۲۰۰ تر ۲۰۰۰ کیلومتره واټن کې د هدف په نښه کولو وړتیا لري.
چارواکي وايي، دا توغندی ۱۱ زره کیلوګرامه وزن لري او نژدې لس نیم متره اوږد دی. هندي ماهرین وايي، دا د عصري توغندیزې تکنالوژۍ پر مټ چمتو شوی توغندی د اتومي برید وړتیا لري.
د دې لړۍ توغندیو لومړنۍ تجربه د ۲۰۲۱ په دسمبر کې وشوه، خو د چارشنبې تجربه بیا لومړنۍ هغه ده، چې د شپې لخوا تر سره شوې.
هند حکومت د هېواد وسله وال پوځ لپاره د عصري وسائلو او تجهیزاتو چمتو کولو هڅې کوي او د دې لپاره د ځايي تکنالوژۍ پر مټ په هېواد کې دننه د وسلو او تجهیزاتو پر چمتو کولو بوخت دي.
هند پروسږ کال د ۲۱ زره کروړو (۲۱۰ میلیارد) روپیو پوځي وسلې او تجهیزات ځینو نورو هېوادونو ته هم صادر کړل، چې په هند کې چمتو شوې جنګي الوتکې هم پکې شاملې دي.
URL تعقيب: https://www.ansarpress.com/pashto/30963
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني