د طالبانو حکومت په افغانستان کې د ملکي او نظامي کارکوونکو له معاشونو د تقاعد جمع کول بند کړي دي.
د طالبانو د مشر مولوي هبت الله اخندزاده له خوا د ماليې وزارت ته په استول شوي حکم کې راغلي چې "د ۱۴۰۳ مالي کال د حمل له مياشتې د ملکي او نظامي کارکوونکو له معاشونو څخه د تقاعد وضع کېدل بند شوي دي."
د طالبانو حکومت کې د ماليې وزارت يوې سرچينې هم د دغه فرمان پخلی کړی او وايي د دې حکم له مخې له دې وروسته "تقاعد نشته."
د طالبانو د مشر په فرمان کې د ماليې له وزارته غوښتل شوي چې د ټولو شته نظامي او ملکي کارکوونکو په اړه معلومات چې په هغو کې "د ګومارنې نېټه، د خدمت موده او د تقاعد تر نامه لاندې وضع شوی مبلغ معلوم کړي. "
د ماليې وزارت کې يادې سرچينې ويلي، د هغو کسانو چې پخوا ترې تقاعد ګرځول شوی موضوع جلا ده او په اړه یې تراوسه حکم نه دی شوی. دا سرچینه زیاتوي چې دغه مکتوب په رسمي ډول مالیې وزارت ته رسېدلی دی.
په افغانستان کې د طالبانو له بيا واکمنۍ راهيسې د افغان متقاعدينو د معاشونو د ورکړې بهير له خنډونو سره مخ و. د تقاعد اخيستونکو سرټکاوه چې د طالبانو حکومت یې پيسې نه دي ورکړي او دا چې له اقتصادي ستونزو سره لاس او ګرايون دي.
د طالبانو حکومت وياند ذبيح الله مجاهد د روان میلادي کال په لومړیو ورځو کې د بي بي سي پښتو د اېکس په خپرونه کې ويلي وو، د تقاعد د ورکړې قانوني ستونزې هوارې شوې او ډېر ژر به د دوی حقونه ورکړل شي.
نوموړي زياته کړې وه چې د متقاعدينو د حقونو د ورکړې قانون تعديل شوی او ډېر ژر به د عدليې وزارت له خوا پلی شي. خو داسې ښکاري چې تر اوسه په دې اړه پرېکړه نه ده.
افغانستان کې د تقاعد عمر ۶۵ کاله دی او يا دا چې بايد یو کس ۴۰ کلنه کاري موده بشپړه کړې وي.
افغانستان کې د تقاعدۍ امتياز اخيستونکو کره شمېر نه دی معلوم خو په تېرو کلونو کې د افغانستان ماليې وزارت د ۱۱۹ دولتي ادارو اړوند څه د پاسمه ۱۵۲ زره کسان ياد کړي وو چې د تقاعد حقونه ورکول کېږي.
د طالبانو حکومت کې د ماليې وزارت تېر کال د متقاعدينو د معاش اړوند طرزالعمل د دوی مشر هبت الله اخندزاده ته استولی و.
هغه مهال د ماليې وزارت ويلي وو چې څلور ميليارده افغانۍ یې د متقاعدينو د معاش لپاره وربېلې کړې وې خو داسې ښکاري چې د طالبانو مشر نه دې منظورې کړې.
که څه هم ښاغلي اخندزاده په خپل فرمان کې د تقاد بندولو دلایل نه دي وړاندي کړي، خو ويل کېږي يو شمېر طالب مشرانو د خپل تعبیر له مخې له شرعي اړخه د متقاعدينو حقوق تر پوښتنې لاندې راوستلي دي.
د افغان پوځ يو پخوانی افسر چې ۳۸ کاله یې خدمت کړی وړاندې بي بي سي ته ويلي وو چې د تقاعد نه اخيستو له امله له ګڼو اقتصادي ستونزو سره لاس او ګرايوان دی او د ژوند د ورځنيو چارو پر مخ بېولو لپاره یې په کور کې ساتلي سره زر خرڅ کړي دي.
URL تعقيب: https://www.ansarpress.com/pashto/30897
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني