انصار: ( دوری 8مه)، د بلخ ولایت ځایي امنیتي چارواکي په دغه ولایت کې په تېرو دوو میاشتو کې د کوکنارو له کښت څخه د ۲۰۰ جریبه ځمکې د پاکولو خبر ورکوي.
له دغې پدیدې سره د مبارزې پردوام، د یاد ولایت مسوولینو د خپلو پرله پسې کمپاینونو په لړ کې د بلخ ولایت په چهاربولک، چمتال، بلخ، شولګره او یو شمېر نورو ولسوالیو کې په زیاته اندازه ځمکه د کوکنارو له کرکېلې څخه پاکه کړې ده.
د بلخ ولایت امنیه قومندان ملا عبدالرازق راشد وایي، کوکنار یو مضر او زهري بوتی دی او د حکومت د مشرتابه د فرمان له مخې، وروسته له دې هېڅوک حق نه لري چې دغه بوټی وکري.
بلخوا بزګران د کوکنارو له اړولو هرکلی کوي؛ خو وایي، چې لاهم د بدیل کښت د رامنځته کېدو لپاره ورته هېڅ کار نه دی شوی.
د بلخ ولایت دوه تنه کروندګر سلام بای او شاه ولي وایي، چې حکومت دې د کرنې په برخه کې د وسایلو، کیمیاوې سرې، اصلاح شويو بذري تخمونو او د اړتیا وړ نور توکي ورسره مرسته وکړي.
ورته مهال د بلخ ولایت د کرنې، اوبولګولو او مالدارۍ ریاست د کرنیزو توکو د ترویج مدیر محمد حسین عظیمي وایي، چې تېر کال یې پر ۳۷ زره بزګرانو باندې اصلاح شوي تخمونه، کیمیاوي سره او نور وسایل وېشلي او د روان کال تر پایه به له دوی سره نورې مرستې هم وشي.
که څه هم د حکومت مبارزه په یاده برخه کې د لاسته راوړنو ډکه بلل کېږي؛ خو ټینګار دا دی، چې مسوولین دې د کوکنارو او نورو نشه یي توکو د کښت پربدیل کار وکړي، ترڅو د یادو بوټو له بیا کرل کېدو او د ځوانانو پر نشه کېدو ترې مخنیوی وشي.
URL تعقيب: https://www.ansarpress.com/pashto/30784
د فرشتې کوهستاني او د هغه د ورور مړي خاورو ته وسپار شول