انصار: ( دکب 28مه)، ځینو خبریالانو په افغانستان کې د طالبانو حکومت د ویاند ذبیح الله مجاهد له قوله ویلي، چې نوموړي پر خواله رسنیو په پکتیکا او خوست ولایتونو کې د پاکستان د هوايي بریدونو د خپاره شوي خبر پخلی کړی. پاکستان رسما تر اوسه ددغه برید په اړه څه نه دي ویلي. خو ځینو خواله رسنیو چې غالبا د پاکستاني حکومت له لوري چلول کېږي، ددغه برید په اړه خبر خپور کړی دی.
د طالبانو حکومت هم دوو نورو سرچینو ویلي چې د ډیورنډ فرضي کرښې ته څېرمه پاکستان پکتيکا برمل کې درنه بمباري کړي، ښځې او ماشومان يې شهيدان کړي دي، اسلامي امارت دفاع وزرات ته هم د اړوند ځوابي حملې امر شوى دی.
د طالبانو د زندانونو د ساتنې عمومي مسؤل قاري بدر پر اېکس (ټوېټر) لیکلي چې طالبان له خپلې خاورې د کلک ملاتړ ترڅنګ هر ډول دفاع ته چمتو دي.
په ورته وخت کې، د طالبانو د ټرانسپورټ او هوايي چلن وزارت عملیاتي معین مولوي فتح الله منصور هم کابو ورته پیغام پر خپله اېکس (ټوېټر) پاڼه خپور کړی دی.
خبریال طاهر خان پر اېکس لیکلي چې د پاکستاني طالبانو تحریک (ټي ټي پي) ویاند محمد خراساني د افغانستان پکتیکا او خوست ولایتونو کې د پاکستان هوايي بریدونه تایید کړي، خو ادعا کوي چې وزیرستاني بې ځایه شوي په نښه شوي دي.
د خراسان ډایري په نامه یوې رسنۍ ویلي بریدونه د خوست او پکتیکا ولایتونو په هغو ولسوالیو کې شوي چې له شمالي وزیرستان او جنوبي وزیرستان سره ګډه پوله لري.
خراسان ورځپاڼې ویلي، یوې جګپوړې سرچینې دوی ته ویلي، پاکستان پکتیکا کې د قومندان عبدالله شاه کور په نښه کړی دی.
قومندان عبدالله شاه چې په توبه ګار هم مشهور دی، د لوړ وزیرستان شاکتوی اوسېدونکی بلل شوی.
یادې رسنۍ د پاکستاني طالبانو د تحریک له قوله د برید د تایید ترڅنګ ویلي چې د ټي ټي پي د دغه قومندان کور پر کنډواله اوښتی دی.
وړاندې، د افغانستان لپاره د پاکستان ځانګړي استازي اصف دراني ادعا کړې چې اسلام اباد د دې شواهد لري د پاکستاني طالبانو تحریک ټي ټي پي د افغان پراکسیانو په وسیله له هند پیسې ترلاسه کوي.
هغه ویلي چې د ټي ټي پي له ۵۰۰۰ تر ۶۰۰۰ پورې وسله والو په افغانستان کې پناه اخیستې ده، چې د کورنیو له غړو سره یې ټول شمېر ۷۰ زرو ته رسېږي. بی بی سی
URL تعقيب: https://www.ansarpress.com/pashto/30652
