انصار: ( د سلواغی ۲۱مه)، په دوحه کې د افغانستان په اړه د ملګرو ملتونو په کوربه توب د ځانګړې او مهمې ګڼلې شوې غونډې له را نژدې کېدو سره، د افغانستان د ښځو او بشري حقونو په چارو کې د امریکا ځانګړې استازې رینا امیري یو ځل بیا په دغه هېواد کې د ټول ګډونه حکومت پر جوړېدو ټینګار کړی.
رینا امیري دا خبره پر خپلې ایکس پاڼې، یا پخواني ټویټر لیکلې او ویلي چې په دې اړه یې په امریکا کې د ازبکستان له سفیر سره د لیدنې پر مهال خبرې کړې دي.
د دوحې غونډه په پام کې ده، چې د روانې میلادې میاشتې په اتلسمه او نولسمه ترسره شي.
طالبان تر اوسه په دې ناسته کې د خپل پلاوي ګډون نهایي کړی نه دی، خو داسې ښکاري چې دا ګډون یې ځینو مسایلو سره مشروط کړی.
د افغانستان لپاره د ملګرو ملتونو د نوي ځانګړي استازي له ټاکلو انصراف، له تور نوملړ څخه د طالب مشرانو د نومونو ایستل او ځینې نور هغه غوښتنې دي د طالبانو چارواکو په بېلابېلو بڼو په دوحې غونده کې له خپل ګډون سره مشروط کړي.
طالبانو د امریکایي استازې تازه څرګندونو ته غبرګون نه دی ښودلی، خو تر دې مخکې یې تل خپل رژیم ټول شموله ګڼلی او پکې د بدلون بهرنۍ غوښتنه یې د افغانستان په کورنیو چارو کې لاسوهنې ګڼلې دي.
URL تعقيب: https://www.ansarpress.com/pashto/30065
