انصار: (د مرغومی ۱۵ مه)، د طالبانو د رژیم ویاند ذبیح الله مجاهد او د پرځېدلي جمهوري نظام لومړي مرستیال امرالله صالح په افغانستان کې د داعش ډلې د حضور په اړه تازه څرګندونې او ادعاوې کړې دي.
صالح په خپله اېکس پاڼه کې ادعا کړې، چې د معلوماتو له مخې یې د طالبانو استخبارات له داعش ډلې سره په بګرام زندان کې د خپلو پخوانیو بندیانو د یو ځای کېدو په اړه اندېښمن دي.
د هغه په خبره، طالبانو د خپلو دغو پخوانیو بندیانو په اړه څېړنې پیل کړې دي.
له دې سره، د طالبانو د حکومت ویاند ذبیح الله مجاهد په افغانستان کې د داعش ډلې د بشپړ ځپل کېدو ادعا کړې او ویلي، چې تر ۷۰-۸۰ تنو پورې داعشیان په دغه هېواد کې موجود دي.
مجاهد د دغو داعشیانو د ځپلو لپاره هم د خپلو ځواکونو د هڅو خبر ورکړی.
په وروستیو کې له داعش ډلې سره د پاکستان د ملاتړ ادعاوې زیاتې شوي .
د طالبانو د دفاع وزیر ملا یعقوب تېره اوونۍ په یوه خبري ناسته کې وویل، چې د دوی له بیا واک ته رسېدو سره په افغانستان کې بریدونه د تاجکستاني او پاکستاني وګړو له لوري ترسره شوي دي.
هغه دغه راز، د دوی خلاف د وسله والو ډلو د ۹۰ سلنه ځپل کېدو ادعا وکړه او ویې ویل چې ۱۰ سلنه نور هم ځپل کیږي.
URL تعقيب: https://www.ansarpress.com/pashto/29421
