د افغانستان کرېکټ بورډ غوراوي کمېټې د چین په کوربه توب د ۱۹ پړاو اسیايي لوبو لپاره د کرېکټ لوبډله اعلان کړه چې له یوې اوږدې مودې وروسته نورعلي ځدراڼ او شهزاد محمدي هم په اصلي لوبغاړو کې غوره شوي دي. افغان کرېکټ بورډ دغې لوبډلې ته د ’افغان ابدالیان لوبډلې’ نوم ورکړی دی.
دا له څو کالو د مخه د افغانستان د کرېکټ د پیل دوه مشهور توپ وهونکي دي چې په کورنیو سیالیو کې یې لا هم خپل کرېکټ ښه ساتلی خو په نړیوالو ډګرونو کې په وروستیو څلورو کالونو کې پرې ډېر باور نه دی شوی.
نور علي د ورو تخنیکي او با حوصلې لوبغاړي په توګه پېژندل کېږي چې اوس یې په ملي لوبډله کې ځای ابراهیم ځدراڼ ډک کړی. شهزاد محمدي بیا د پیل چټک توپ وهونکی او وېکټ ساتونکی و چې تر ډېره یې اوس پر ځای رحمان الله ګربز لوبېږي.
د دوی تر څنګ د پیل بل پخوانی لوبغاړی افسر ځاځی، کریم جنت، شرف الدین اشرف او فرید احمد ملک هم ابدالیان لوبډلې ته غوره شوي.
کرېکټ بورډ ویلي په اسیايي لوبو کې به د افغانستان د لوبډلې لوبډلمشر ګلبدین نایب وي، دې په تېر ۲۰۱۹م نړیوال جام کې هم لوبډلمشر ټاکل شوی و خو هغه وخت د لوبډلې څرنګوالي ګرم بحثونه وپارول.
د کرېکټ بورډ له خوا په اعلان شوې نوملړ کې د ملي ټيم د دغو پخوانیو لوبغاړو تر څنګ د قیس احمد او ظاهر خان ټاکنې ته هم د ډېرو پام دی.
دوی دواړه ورو توپ اچونکي دي چې د نړیوال سوداګریز کرېکټ پراخه تجربه لري خو په افغان ملي لوبډلې کې یې ډېر وخت ځای نه دی موندلی.
په ملي لوبډله کې په ورو بال تر ډېره سترګې مجیب الرحمان او راشد خان ته وي.
د چین اسیايي لوبو ته په تلونکي نوره لوبډله کې زبېد اکبري، صدیق اتل، شاهد کمال، وفېع الله تره خېل، نجات مسعود، او سید شېرزاد شامل دي.
دوی هم وخت نا وخت ملي لوبډلې ته غوره شوې دي.
د افغانستان کرېکټ بورډ ویلي افغان ابدالیان لوبډله به نېغ په نېغه د اسیايي لوبو په کوارټر فاینل کې لوبېږي.
د افغان کرېکټ بورډ لخوا لوبډله د نورو هېوادونو پر تله لږ په ځنډ اعلان شوه او کرېکټ بورډ یې هم دلېل د اسیايي لوبو مهالوېش کې ممکنه بدلون بللی و.
د کرېکټ بورډ ویاند سید نسیم سادات په یوه خبر پاڼه کې لیکلي "کله چې د بحرین لوبډله یادو لوبو کې ګډون ته حاضره نشوه نو افغانستان د اسیایي هېوادونو درجه بندۍ کې په غوره لوبډلو کې د شتون له کبله وکولای شول چې د هند، پاکستان، سريلانکا او بنګله دېش وروسته نیغ په نیغه کوارټر فاینل ته لاره ومومي چې د مهالوېش وروسته به، کله چې د پاتې ۹ لوبډلو (درې ګروپونو) څخه یوه-یوه لوبډله د کوارټر فاینل لوبو پړاو ته لار ومومي، جوته شي چې افغان لوبډله به د کوم هیواد سره په کومه نېټه خپل کوارټر فاینل لوبه ترسره کوي."
د اسیایي لوبو ۱۹ پړاو په روانه سپټمبر میاشت کې په چین کې پیلېږي، ټاکل شوې وه دغو سیالیو کې د ۱۵ هېوادونو ترمنځ د کرېکټ سیالۍ تر سره شي خو بحرین په سیالیو کې له لوبېدو وتلی.
دا سیالۍ د ۴۵ هېوادونو تر منځ په بېلابېلو برخو کې پلان دي او له افغانستان څخه هم د کرېکټ تر څنګ ګڼو نورو لوبډلو د بېلګې په توګه واليبال، ووشو، جودو، تکواندو او نور لوبغاړي برخه اخلي.
LINK: https://www.ansarpress.com/english/27130
Afghan U19 Futsal Team Beats Uzbekistan 8-1 
